PENGERINDU

PENGERINDU tu siti ari pekara ti pemadu beguna ba tiap iku kitai mensia. Nadai pengerindu, pengidup kitai nadai reti tauka nadai tuju. Pengerindu mai pemaik, pemendar, pengelantang, penyerakup enggau peransang pengidup. Reta pengeraja, pengelantang dunya, pangkat sereta pemanah gamal ukai jamin kitai ulih idup enggau ati ti gaga sereta lantang. Mimitpan pemisi kitai, nyema pengerindu nyadika tiang lalau, nyadika api penenggau, kitai agi ulih idup enggau gaga ati. Ditu aku deka bejuraika reti pengerindu ba pengidup urang kristen.

Dalam surat ti ditulis Rasul Paul ngagai urang Korint, 1KORINT13:4-7, 8 bisi nerangka reti pengerindu. Pengerindu nya pengeliat enggau penelap; iya ukai ati ti kepapas, tauka temegah, tauka sumbung; pengerindu ukai perangai ti jai, tauka rangka, tauka jampat ringat; pengerindu enda ngitung penyai; pengerindu ukai gaga ke utai ti jai, tang iya gaga ke utai ti bendar. pengerindu nya tan dalam semua utai ti nyadi, arapka semua utai, ngadang semua utai, liat ati sereta mujur ngereja utai. Pengerindu meruan belama-lama.

Reti pengerindu ti manah beguna amat dikena kitai meratika jaku ajar dalam Injil. Nitihka Injil, pengerindu ukai ketegal pengingin urang laki enggau urang indu ke pangan diri, tauka ukai semina asai ati. Injil bejuraika pengerindu tu pengeliat ati, semampai sereta entap pemutus berunding ka urang bukai, ngelantangka urang bukai dulu enggau nulung sida. Tuhan rinduka kitai ngena jalai nya, sereta meri penau dalam ati kitai awakka ulih rinduka urang bukai.

Lebuh siku pengajar Adat nanya ba Jesus, ni bagi pesan ti pemadu besai ari semua, dia Jesus nyaut iya, MARK12:30 'Nuan enda tau enda rinduka Tuhan ti Allah Taala nuan enggau pengabis ati nuan, enggau pengabis semengat nuan, enggau pengabis runding nuan, sereta enggau pengabis pengering nuan.' Pesan ti nangkanka nya munyi tu. 'Nuan enda tau enda rinduka pangan diri asai ti rinduka diri empu.' Nadai pesan bukai ti besai agi ari pesan dua bengkah tu. Pesan ti disebut Jesus nya lebih agi beguna ari ti meri jelu ka genselan enggau meri sebarang piring bukai ngagai Allah Taala.

Pesan ti keterubah iyanya pengerindu ke Allah Taala. Bakani kitai nunjukka pengerindu ngagai Allah Taala? Mayuh jalai tauka chara kitai urang kristen ulih nunjukka pengerindu kitai ngagai Apai. Kesatu, kitai semina nyembah Allah Taala siku aja, iyanya Allah Taala Apai, Allah Taala Anak enggau Allah Taala Roh Kudus.

Kedua, kitai rinduka Iya ngena chara macha sereta berati ka Jaku Iya dalam Injil tauka Bup Kudus lalu nitihka perintah Iya enggau pengabis ati kitai.

Ketiga, anang ngereja penyalah tauka dosa baka ngemulaka urang, berandauka urang, begedika urang, butang, munuh urang, ngenchuri, amu ke utai urang enggau mayuh agi penyalah bukai. Sigi tusah kitai ka ngiarka diri ari ngereja penyalah laban kitai semina mensia biasa aja, tang enti kitai ngaku penyalah diri ngagai Tuhan, sekalika penyalah nya sengaja digaga tauka enda, kitai udah nunjukka pengerindu kitai ngagai Tuhan. Udah kitai minta ampun ari Iya, badu agi ngereja penyalah bakanya baru.

Keempat, ngereja sebarang pengawa ketegal Iya, ukai ketegal pulaika pemanah sereta penguntung kitai siku aja. Nama reti bagi ti keempat tu? Reti iya, tiap iku kitai mensia udah diberi penau magang nitihka takar ti diberi Iya. Guna manah penau nya kena muliaka Iya ngena jalai nulung urang ti tasah, urang ti seranta sereta urang ti patu balu. Ngambika chunto, baka urang ti diberi penau ngajar urang, iya patut ngajar enggau pengabis ati iya sereta bekunsi penemu iya ngagai urang bukai. Urang ke bisi penau dalam nengkebang lagu, patut nengkebang lagu ti meri berekat ngagai pengidup urang bukai baka lagu puji sereta sembah. Bup MATTHEW 25:29 bisi nulis 'Laban genap iku urang ti udah bisi deka diberi mayuh agi, lalu iya deka bisi mayuh lebih ari ti chukup. Tang iya ti nadai, kengka utai dikemisi iya deka diambi magang.'

Pesan kedua nya, Jesus madahka kitai patut rinduka pangan diri asai ti rinduka diri empu. Pengerindu ke bakatu lebih agi ditunjukka kitai ba pengidup melaki bini, pengerindu anak ke apai indai, pengerindu ke diri menyadi sereta diri sabilik, pengerindu ke bala kaban sereta ngagai urang bukai taja kitai enda ngelala sida.

Pengerindu ti patut ditunjuk ba pengidup melaki bini baka ke ditulis dalam 1PETER3:1-7. ' Baka nya mega kita ti bini enda tau enda nundukka laki kita, ngambika enti sebarang sida enda arapka Jaku Allah Taala, ari pendiau kita, sida deka arap. Enda ibuh kita bejaku saleka, laban sida deka meda gaya penuchi enggau penangi pendiau kita. Kita enda patut ngias diri ngena ngepan ti dipeda tauka barang mas ti dikena kita, tauka gari ti dirasukka kita. Tang pemajik ti enda tau jai, ati baruh ti jenuh, ti besai bendar guna dipeda Allah Taala, laban sida indu ti tuchi dulu kelia ti bepanggai atas Allah Taala, sida ngasuh diri empu bajik ngena pengawa ti nundukka laki sida. Sarah empu mega bakanya. Iya ngasika Abraham, lalu ngumbai Abraham nya tuan iya. Diatu kita nyadi anak iya, enti kita ngereja utai ti badas lalu enda takut ke sebarang utai. Bakanya mega kita ka laki, enda tau enda begulai enggau bini kita enggau ati ti mereti, kita patut nemu sida nya lembut agi ari kita. Anang enda bebasaka sida, laban sida mega deka sama enggau kita nyambut pengidup ari pengasih Allah Taala. Kereja nya ngambika sembiang kita nadai dikachau.' Reti ti dipadahka Bup Kudus tu iyanya, laki enggau bini enda tau enda rinduka pangan diri, enda ingin ka laki bini urang bukai sereta meruan idup sekunsi belama.

Pengerindu anak ke apai indai ulih dibantaika kita ngena chara ngasika apai indai diri laban nya ti patut dikereja kita. Munyi ti ditulis dalam EFESUS 6:2-4, ''Bebasaka apai enggau indai nuan'' nya pesan ti terubah, lalu ditambahka jaku semaya munyi tu, "ngambika nuan mujur dalam semua pengawa sereta gayu nguan menua tu." Apai enggau indai mega dilalau dalam Injil enda tau ngereja pengawa ti tau ngasuh anak kita ringat, tang kita patut ngibun sida ngena atur enggau ajar urang kristen.

Pengerindu ngagai bala menyadi enggau diri sabilik tau ditunjukka kita ngena chara begulai manah enggau pangan diri, anang mechat pangan diri, anang nesatka runding sida ke enda arapka Tuhan, sama ngering ka pangan diri enti maya ditinggang penusah sereta bejaku manah enggau pangan diri.

Pengerindu ngagai bala kaban enggau urang bukai tau dibantaika kita baka mendingka sida maya sida nusi penusah ti ninggang sida, nulung sida ngau pengeliat sereta pengabis ati maya sida enda bedaya, maya sida alah laban penguji, beri sida jaku peransang pengidup ngena Jaku Allah Taala sereta bekunsi pemisi enggau sida ti seranta, urang ke patu balu tauka sapa-sapa ke nguna bantu ari kita. Dalam GALATIA5:13 madah munyi tu, " Nyadi pasal kita menyadi, kita dikangauka ngagai pengelepas. Tang anang ngena pengelepas nya, endur kita diperintah gaya pengidup mensia ti bedosa ari asal. Tang awakka pengerindu ngasuh kita nulung diri sama diri"

Kitai ukai semina rindu ka urang ti rinduka kitai aja, tang kitai mega patut rinduka munsuh kitai. Enti kitai enda rindu ka munsuh kitai, kita sama disemaka urang jai. Indah urang ke jai nemu rindu ka pangan iya sereta sida sabilik tang sida begedi ka munsuh sida. Urang kristen enda tau bakanya. Rindu ka munsuh kita mega asai ke rinduka diri empu lalu ampunka dosa sida ngagai kita. Enti nyema kita enda ngampunka dosa sida, Allah Taala Apai mega enda ngampunka dosa kita. Tang enti kita ngampunka munsuh kita, Allah Taala Apai mega ngampunka dosa kita dikena Iya nunjukka pengasih sereta pengerindu Iya ke kita.

Bala menyadi dalam kristus, idup meh dalam pengerindu, laban Allah Taala nya endang pengerindu. Iya mandangka pengerindu Iya ke kitai mensia lebuh Iya nganjung Jesus ke dunya nyadi Penebus sereta Penyelamat kitai. Pemati Tuhan Jesus ba atas kayu regang, nunjukka pengerindu Iya ke kitai taja kitai tu urang ti bangat bedosa. Ketegal pemati Jesus, kitai bulih pengidup baru. Darah Jesus nyadika genselan kena masu dosa kitai awakka kitai ulih bebaik enggau Allah Taala. Enti Allah Taala udah nunjukka pemesai pengerindu Iya ngagai kitai, arinya kitai patut nunjukka pengerindu ngagai pangan diri.

1JOHN4:12 nulis, " Nadai siku urang udah meda Allah Taala, tang enti kitai rinduka pangan diri, Allah Taala deka besaum enggau kitai, lalu pengerindu Iya nyadi chukup menyana dalam kitai.

1KORINT13:13 "Nyadi utai tiga bengkah tu agi menkang: pengarap, pengadang enggau pengerindu; lalu iya ti pemadu besai nya pengerindu."

PENGIDUP BARU

2KORINT5:17

"LEBUH BARANG URANG BESAUM ENGGAU KRISTUS, IYA NYA URANG TI BARU; IYA TI LAMA NADAI AGI, IYA TI BARU UDAH DATAI"

Jaku ba Bup Kudus tu balat amat meri bekau ba dalam ati aku. Jaku tu meri reti ngagai kitai, nyema kitai besaum enggau Jesus Kristus, dosa kitai ke lama udah diampun. Kitai tuchi baru lebih burak agi ari seleju. Kitai nyadi urang baru laban ti udah mati ketegal dosa tang diidupka baru ulih roh Allah Taala lebuhka dibasu pala dalam nama Apai, Anak enggau Roh Kudus.

Sebedau ngelala Jesus dalam pengidup aku, aku baka anak domba ke tesat. Bala munsang ngantika deka nerkam, deka nyangkam, deka makai, deka nelan laban anak domba kurang pengalaman dalam pengidup. Anak domba nadai urang nyaga sereta nadai urang meri jaku ajar pasal jalai nuju pengidup ti meruan.

Ngelamatu, aku ninga rita Iya, aku nerima Iya ari aku ada ke dunya, tang aku nadai ngasaika pemisi Iya dalam pengidup aku. Tang Iya sigi udah ngelala aku sebedau aku ada ke dunya. Sebedau aku nyadi makin tesat, Iya datai nyua ka pengasih Iya nyelamatka aku. Semua penguji ke datai nuntung, amat meri pemerinsa, tang nya dikena Iya ngasuh aku datai ngiga Iya. Iya sigi enda jauh tang ketegal dosa ti ngaga dinding ngasuh aku enda ngasaika pengasih Iya.

Diatu aku mensia baru, laban dosa aku udah diampunka Iya. Diatu aku idup ketegal Kristus ukai ketegal aku empu. Berekat datai dalam pengidup aku ti ngasuh aku deka bekunsi berekatnya enggau semua urang. Berekat pengasih Iya, ti mai penampak dalam dunya tu.

Udahka enda Jesus nyadika penebus nuan? Enti udah, nuan diatu urang baru, sereta pengidup nuan bepun ari utai ke baru. Engka diatu nuan agi kakang ati pasal pengidup baru tu tauka Jesus udah kala nyadi siti dan pengidup nuan suba tang diatu nadai agi. Deka bepun baru, beri meh pengidup nuan ngagai Iya. Nyadi urang ke bejalai seretai enggau Iya nuju pengidup ti meruan di serega.

PEMANDANG21:5 Udahnya Iya ti duduk atas penuduk bejaku: "Nyadi diatu Aku ngaga semua utai nyadi baru!"